Астана қаласының медицина қауымдастығы үшін маңызды оқиға— елордадағы «Отан соғысы ардагерлеріне арналған Орталық клиникалық госпиталь» шаруашылық жүргізу құқығындағы Республикалық мемлекеттік кәсіпорнының ұжымы салалық «QazMed» кәсіподағының қатарына қосылу туралы шешім қабылдады. Бұл қадам — жай ғана ресми рәсім емес, медициналық ұйымдар мен олардың қызметкерлерінің кәсіподаққа деген зор сенімінің көрінісі. Сонымен қатар, бұл – кәсіподақ ұсынатын құқықтық, әлеуметтік және кәсіби кепілдіктердің медициналық сала мүдделеріне толық сай келетінін айғақтайды.

Аталған госпиталь – ардагерлер мен оларға теңестірілген азаматтарды әлеуметтік қорғау жөніндегі мемлекеттік саясатты іске асыру мақсатында құрылған маңызды медициналық мекеме. Мұнда кәсіби жауапкершілік, пациентке деген терең құрмет және тиімді командалық жұмыс күнделікті тәжірибенің басты қағидаттарына айналған. Ашықтық, әділдік, өзара қолдау мен сенімді қарым-қатынас – тек медициналық қызметтің емес, кәсіподақ жұмысының да өзегін құрайды.

«QazMed» кәсіподағына қосылу – бұл ұжымның өз құқықтарын қорғауға, еңбек жағдайын жақсартуға және әлеуметтік тұрақтылықты қамтамасыз етуге бағытталған саналы әрі бірлескен шешімі. Бұл бастама госпиталь қызметкерлерінің кәсіби және әлеуметтік дамуына жаңа мүмкіндіктер ашатыны сөзсіз.