Медицина қызметкері күні қарсаңында Жамбыл облысында «QazMed» салалық кәсіптік одағының мүшелері болып табылатын денсаулық сақтау саласы өкілдерін ұлықтауға арналған салтанатты іс-шаралар өтті.

«QazMed» салалық кәсіптік одағының Жамбыл облыстық филиалының төрағасы Махашов Нұрлан Оразқұлұлы өңірдегі медициналық ұйымдарды арнайы аралап, дәрігерлерді, орта және кіші медицина қызметкерлерін кәсіби мерекелерімен құттықтап, таңдаған мамандықтарына адалдық танытып жүргендері үшін шынайы алғысын білдірді.

Кездесулер барысында медицина қызметкерлерінің жоғары кәсібилігі, жанқиярлық еңбегі, жауапкершілігі және халық денсаулығын сақтауға қосып жүрген өлшеусіз үлесі ерекше атап өтілді. «QazMed» салалық кәсіптік одағының атынан үздік қызметкерлерге марапаттар, алғыс хаттар және естелік сыйлықтар табыс етілді.

Медициналық ұйымдардың ұжымдарымен кездесуде Нұрлан Оразқұлұлы медицина қызметкерлерінің еңбегі зор құрмет пен жоғары бағалауға лайық екенін атап өтті. Өйткені дәл осы мамандар күн сайын азаматтардың денсаулығы мен әл-ауқатының сақталуына қызмет етіп келеді.

Кездесулердегі жылы атмосфера, шынайы ризашылық сөздері мен лайықты марапаттар өз өмірін қоғам игілігіне арнаған ақ халатты абзал жандарға деген құрметтің айқын көрінісіне айналды. «QazMed» кәсіподағы алдағы уақытта да медицина қызметкерлерін қолдауға, олардың еңбек және әлеуметтік-экономикалық құқықтарын қорғауға, сондай-ақ медицина мамандығының беделін арттыруға ерекше көңіл бөлетін болады.

Өткізілген іс-шаралар Жамбыл облысының медицина қызметкерлері қоғамның зор құрметі мен сеніміне ие екенін тағы бір мәрте дәлелдеді. Олардың күнделікті еңбегі еліміздің денсаулық сақтау жүйесінің тұрақты дамуының маңызды құрамдас бөлігі болып табылады.