«QazMed» салалық кәсіподағы Жамбыл облыстық филиалының төрағасы Нурлан Махашов заң қызметімен бірге 2025 жылғы 13 қазанда Тұрар Рысқұлов аудандық орталық ауруханасына барып, 2019 жылғы 26 шілдеде туған, 6 жасар бала Жолшыбек Али Еламанұлының өліміне байланысты мәселені қарады.

Кәсіподақ өкілдері аурухана басшылығымен, науқас қайтыс болған түні кезекшілік атқарған медицина қызметкерлерімен және емдеуші дәрігермен кездесіп, әңгімелесті.

7 қазан күні бала жоспарлы түрде аудандық орталық аурухананың балалар бөліміне жатқызылған. Ол әжесімен бірге жеке палатада болған, әжесіне жеке төсек-орын берілген.

10 қазан күні таңғы сағат 06:23 шамасында бала қайтыс болды.

Сот-медициналық сараптама тағайындалып, тиісті тексерулер жүргізілді. Қазіргі уақытта материалдар мұқият зерделеніп жатыр. Ауруханада облыстық денсаулық сақтау басқармасының арнайы құрған комиссиясы өз жұмысын жалғастыруда.

Кәсіподақ өкілдері аурухананы, соның ішінде науқас жатқан №1 палатаны аралап көрді.

Қазіргі таңда сотқа дейінгі тергеу амалдары басталды, барлық қажетті зерттеу және тергеу іс-шаралары жүргізілуде. Сот-медициналық сараптама мен МФБК қорытындысы күтілуде.

«QazMed» кәсіподағы аурухана ұжымына барлық қажетті көмек пен қолдау көрсетілетінін жеткізді.