Жаңа оқу жылының қарсаңында «QazMed» салалық кәсіподағының бастауыш ұйымдары бастауыш сыныпқа баратын кәсіподақ мүшелерінің балаларына қолдау көрсетті. Көптеген отбасылар үшін бұл — ерекше әрі толқулы кезең, сондықтан кәсіподақ комитеттері мектепке дайындығын сәл де болса жеңілдетуге және қуанышты етуге тырысты.

Мәселен, Масғұт Айқымбаев атындағы аса қауіпті инфекциялар ұлттық ғылыми орталығында 14 қызметкерге 40 мың теңгеден материалдық көмек берілді. Қызылорда облыстық Ұлттық сараптама орталығы филиалында қызметкерлердің балаларына толыққанды оқу құралдары салынған 35 мектеп сөмкесі табысталды, ал Қызылорда обаға қарсы станциясының жұмыскерлері мектепке қажетті тауарларды сатып алуға 10 мың теңгелік сертификат алды.

Ақтөбе облысында сараптама орталығының кәсіподақ комитеті 15 қызметкерге оқу құралдары салынған рюкзактар дайындап берді, ал өңірлік обаға қарсы станцияның жұмыскерлеріне қаржылай көмек көрсетілді. Маңғыстау облысында Ұлттық сараптама орталығында да ата-аналарға балаларын мектепке дайындау үшін 15 мың теңгеден материалдық қолдау ұсынылды.

Алматы қаласында сегіз бірінші сынып оқушысына 10 мың теңгелік мектеп жиынтықтары табысталды, ал Солтүстік Қазақстан облысында кәсіподақ әріптестеріне қаржылай қолдау көрсетті.

Мұндай тәжірибе игі дәстүрге айналып келеді: еліміздің әр өңірінде «QazMed» кәсіподақ ұйымдары өз мүшелерінің отбасыларына жаңа оқу жылы басталар сәтте қолдау көрсетіп келеді. Көмек көрсетуді басқа да алғашқы ұйымдар жалғастырады.